بعد خرجة شباب تعشينا فيها أنا و أخوي و سلطان و فهد و انصقعنا أنا و أخوي الدحمّي في البلوت ,,,
رغم خسارة البلوت خرجت من الكافيه مروق و على أحلى أنغام لمحمد عبده راجع البيت مروق آخر روقان راجع البيت و طربان و قاعد أقلب في أحلى ذكريات لي أيام زمان مع هالأغنية ,, و لا أحلى

عند إشارة التحلية مع المكرونة ,, ماسك أنا أقصى اليمين جات سيارة كبسّت لي العالي تبغى تلف يمين ,, لفيت يسار و عرضت السيارة !! داري إني مخالف بس يالله الآن راح تفتح الإشارة و أمشي ,,

جات سيارة دورية من الخط الثاني ,, كبس لي العالي و شغل السفّتي و قاق قاق جنب يا راعي اللومينا !!

معاه حق أنا غلطان 100% معرض على الخط الأصفر ,,, لا مشكلة لازم آكل على راسي الروقان ما يكمل !!

أخذت الـU-Turn قدامه ,,, و جنبّت

نزل من سيارته ضابط بـ تاج ,,, يعني رائد

طالع فيني بنص عين يقول رخصة و إستمارة …. و أنا مجهزها و أنا ساكت !!

قال: أوووووووووووه ليه تقطع الإشارة ! ! ! !
قلت و أنا منفجع !! : يبوي حرام عليك ! ما قطعت !! أنت كبست و شغلت السفتي وقلت جنب على جنب !! و جيت قدامك و جنبت !!
قال : يعني قاطع الإشارة !! المفروض تحتري لين ما تفك الإشارة و تجنب !!
قلت : أنت جاي من ,,
قال و هو مقاطع كلامي : قدامي قدامي بس !! <– لاحظ الإستحقار بس و عدم المبلاة لكلامي

رحت وراه ,, وقفني عند دوريات و جا خويه : ليه تقطع الإشارة يا هاني !
قلت : يبوي والله ما قطعتها !!
قال الضابط : يعني أنا كذاب أنا كذاب ؟!
قلت : لا بس أوضح لك يبوي !!
قال : لا توضح و لا شي لأصكك بالحجز يومين أنت على سيارتك !!

طبعاً مال المواطن الضعيف هاني إلا إلتزام الصمت و لا يحق لهاني توكيل محامي و سوف يسجل كل شئ لم يحدث ضدك !!

و صكني بمخالفة قطع إشارة + عدم وجود تأمين !!

ما نقول إلا الله يخلّف علي ,,, و الله يصيبه في نفسه

ما يستفاد :
* لمتى هالمشاكل بتفضل عندنا ؟؟ تجاوز من له سلطة علينا بدون أي رادع !!
* لمتى راح يفضل هم الضابط أو العسكري كيفية إنهاء بوك المخالفات و ليس توعية الشعب !!
* لمتى راح يفضل بعض و ليس كل !! الجهلة و غير المتعلمين في هذا القطاع و لمشكلة نفسية أو نقص أو علم عنده يحقد عليك يا لشكلك أو لسيارتك أو حتى لملابسك !!
* و أهم شي لمتى راح تفضل السيارة الرياضية ذات محط أسئلة عند أغلب الناس (n)

ملاحظة // بعد الغّل الي في قلبي صراحة ما كان قدامي إلا دعسة للحبيبة و تفحيطة تفش الخلق

و بهذا تمت بحمد الله إتعاس أحد المواطنين من بعد روقان أليم

وسوم: hani, Hani.NET, net, sindi, قطع, نت, هاني, هاني نت, هاني.نت, مخالفه, مخالفة, إشارة, جده, جدة, دورية, سندي, شرطه, شرطة