يوم الأربعاء على الساعة الثانية ظهراً ,,, احتجت إلى ورقة (برنت) لسيارة أخوي عبدالرحمن عشان استمارته ضاعت فإتجهت إلى مرور الصحافة في جدة لأخذ برنت مؤقت يثبت ملكية السيارة لصاحبها خلال نهاية الأسبوع ,,, لأن الوقت لا يكفي للذهاب إلى للفحص الدوري وعمل الفحص ومن ثم الذهاب لشركة التأمين وعمل تأمين للسيارة ومن ثم إلى الذهاب إلى البنك لدفع الرسوم … الخ فذهبت مباشرة إلى المرور وطلبت البرنت ,,

ملاحظة: فائدة البرنت هي ورقة تثبت ملكيتك للسيارة في حال وقوفك من قبل رجال المرور ولكنها لا تحل محل الاستمارة بالكامل (يعني فيه مخالفة عدم وجود استمارة) , الفرق الوحيد إنه ما يوقفك وتتأخر إلى أن يتأكد العسكري في الميدان عن ملكيتك للسيارة عن طريق العمليات

الحمدلله ما فيه زحمة قدامي شخص واحد فقط ,,, وهالشخص مو راضية تمشي أموره للأسف العسكري شكله متشدد

فراح هالشخص بكل بساطة رفع جواله وقعد يكلم واحد ,,, وقال للعسكري خذ خذ “المالكي” يبيك !!!

أنا قلت بس راح فيها المواطن راح يتهزأ تهزئ لا قبله ولا بعده ,,, طالع فيه العسكري ورفع حاجبه الأيمن وقال:  خلاص خلاص قفل التلفون  , عرفته ما يحتاج , وهات ورقك !!!

ومشاها له !!!!

يا عيني يا عيني ,,, يا ريت عندي “مالكي” في المرور

ما علينا جا دوري وأنا أبتسم للعسكري لو سمحت أبي برنت

وليه تبي برنت !! قلت الإستمارة ضايعة وما يمديني أسوي فحص الآن لأنكم راح تقفلوا باقي نص ساعة على الدوام ما يمديني أروح الفحص وأرجع ومالي إلا السبت وأحتاج ورقة تثبت ملكية السيارة لما أسوقها خلال اليومين حقت نهاية الأسبوع !!

قال ما فيه برنت !!

وأطالع فيه :S قلت يبو الشباب برنت عادي دايماً يطلع وقد أخذته من قبل لما ضاعت الإستمارة (يعني مشيها ياخي الموضوع قد صار !!)

قال أبداً ما فيه برنت !! لو تبي برنت روح لمدير الصالة ,,, قلت في نفسي قهر ما أعرف لي “مالكي”

رحت لمدير الصالة: لو سمحت أبي برنت وقال لي العسكري أجي عندك

مدير الصالة: وشوله البرنت ؟؟

وترجع تشرح السبب …..

مدير الصالة: مو لازم تستخدم السيارة في أيام نهاية الأسبوع !! أستخدم سيارة ثانية !!! ( وينك يا هشام ناظر -السفير في مصر سابقاً- المفروض ردك الشهير: ما شاء الله عندك حلووووول يكون للأخ هذا مو المسكينة هذيك -انقر هنا لمشاهدة تعليق ناظر الشهير-)

قلت: والحل ما فيه أحد يقدر يمشي هالموضوع ؟

قال: روح للمقدم محمد بصفر هو الي يقدر يمشيها

 تنويه (ويكيبيديا): 

مقدم هي رتبة عسكرية عربية. كانت معروفة في العصر العباسي باسم “مقدم المعسكر” . وفي عصر المماليك ، عُرفت ب مُقدم ألف, لكون صاحبها في مقدمة ألف من المقاتلين والمقدم ،هو الامر الذي يتقدم الطليعة من الجيش .

 ونروح للمقدم محمد بصفر

أنا: سلام عليكم

العقيد: وعليكم السلام وما يطالع فيني ماسكت ورق ويسولف مع واحد ثاني

أنا: صامت انتظره يخلص شغله ….

قال: تكلم تكلم أسمعك وأنا أخلص شغلي ( وهنا تتجلى روعة الأخلاق والإحترام للمواطن في التعامل)

شرحت له إنه ما يمديني اليوم أسوي فحص دوري ولازم أخذ برنت يثبت ملكية السيارة

قال: هذي المشكلة بس ؟

قلت في نفسي والله إنه متفهم هالشخص ظلمته لما ما طالع فيني ويسولف مع غيري

قلت: ايه ,, هذي المشكلة

قال: وين موترك ؟

قلت: برا

قال: ممتاز ,,, الآن تتجه للفحص الدوري وهم هناك يعملوا لك الإستمارة ويعطوك البرنت وتعمل الفحص وورقك كامل ,, عندك لين الساعة 5

سؤال يمر في الخاطر فجأة: دام إنهم راح يعطوني برنت هناك !! ليه ما تعطيني هو من هنا الحين !!؟؟

قلت: انت متأكد ؟ الي أخبره انكم تقفلوا بعد 02:30 !!!

قال: هل تتوقع مني إني أوجهك غلط !!! بنبرة تهكمية بحتة معناها إنت وينك أيها المواطن الديناصوري ما تعرف إننا تطورنا من زمان !!!

قلت: والله شي جديد وممتاز جزاك الله خير على المعلومة الجديدة ,,,

وأدعس على الفحص الدوري فرح بما تقدم به قطاع المرور بتمديد أوقات الدوام للساعة الخامسة

وتروح للفحص الدوري ,,, ويا عيني ويا قلبي ,,, سيارات وشمس الظهرية

لكن كله يهون دام الموضوع راح اخلصه في يوم واحد ,,, بدل ما تقعد نهاية الأسبوع في مشكلة برنت والسبت تسوي الاستمارة !! تخلصها في يوم واحد  يا رب لك الحمد

وتجلس في الطابور ساعة لين ما يجي دورك في الفحص

جاااا دوري ووجهي

قال رجل الفحص الدوري (بلهجة جداوية أصيلة): أُستمارتك يا أبويا

قلت: ما عندي بطلع بدل فاقد

قالت: طيب البرنت حق السيارة

قلت: ما عندي برنت طلبته من المرور قالوا أخلص كل شي من عندكم

قال: أوووه أجل يبغالك يبويا تمرنا على خير السبت الصباح !!

قلت: يبوي وش سبته وش صباحه !! المقدم حق المرور قال لي انكم شغالين لين الساعة 5 العصر

طالع فيني موظف الفحص وهو يضحك وقال: خمسة العصر !!! ايش هادا دوام جديد ؟ يبويا المرور هنا 02:15 يقفل الباب حقه

فما راح تقدر تطلع برنت من عندهم لأنهم قافلين ,, فحص السيارات يستمر إلى الساعة 3 أو 4 -ناسي-

قلت: أنا متأكد هو قال لي الين 5 العصر

قال: يبويا الدوام الرسمي للمرور إلى 02:30 وأنا بقول لك هم يقفلوا الباب حقهم من 02:15 ههههههههههه ويضحك !!!

وكمل كلامه ,, الله يعينك السبت تعال أو جيب برنت لو راح تجي بعد 02:15

قلت: أجل المقدم قصده فحص ثاني غير فحصكم ,,, وين الفحص الثاني بجدة ؟

قال -وهو ضاحكاً- : يبوياااا ما فيه فحص في جدة غيرنا

وطبعاً لو تشوفوا وجهي وهو مصدوم

وتبدأ الحوسة ,, لازم تنتظر كل الي قدامك يخلصوا فحص إلى أن ينتهوا ,,, وقضيت يومك في الفحص لكنك ما سويت الفحص !!!

وطبعاً مالك إلا إنك تدعي من صميم قلبك للمقدم الهمام -الي المفروض حسب تعريف ويكيبيديا في مقدمة ألف من المقاتلين- صاحب الحلول السريعة -بسم الله عليه لا أحسده بس الي يسمع سالفتين في وقت واحد- ,,, إلي كلماته ترّن في راسي “هل تتوقع مني إني أوجهك غلط !!!“

 أسئلة كثيرة تدور في الذهن منها:

 @ ليه هالإفتاء السريع وعدم الإكتراث للمواطن إنه يطق مشوار للفحص ويضيع فوق ساعتين في الحر ,,, على معلومة غلط !! والحل كله كان بيده !!!

@ ليه البرنت يعطيك هو على حسب المزاج ؟؟ قبل كذا عطوني هو ببساطة ,,, والموظف حق الفحص سأل عنه أيضاً ببساطة ,, ولكن هذي المرة على آخر الدوام مو رايق يعطيك هو  , والدليل كلام المقدم إنه راح يعطوك البرنت فرع مرور الفحص !!

@ ليه ولمتى مرور جدة (بعض) الأفراد والضباط الي فيه يمارسون غطرستهم بدون أي رادع  !!

@ وأهم سؤال: وهذي غلطتي أنا

ليه ما عندي “مالكي” !!!!